Acsé è poesia

E quand un pensìr pcén el chiapa el vol,
sora 'l misèri umèn e materièl,
quand t'po' tuché sa'n déd parfìn el cél,
e quand te pièc d'sentì cum scalda el sol...

Quand te sa léggia déntra ma la gènt,
e t'sa capì co' t'ha nascost t'èl còr
e quand te si convint che sol l'amor,
el po' gambiè stè mond tant malamènt...

Alora lascia l'anima parlè,
de quél ch'è bona da sentì sol lia,
e fà de tutt parchè se posa fè,

d'i sentimènt nun sol 'na fantasia,
mo 'na realtà ch'aiuta 'n po' a campè.
L'è acsé che 'tu pensìr d'vénta Poesia.