L'ultima ilusion

L'invèrne l'è arivèd tutt in t'un bott,
e sta maténa el tira fort el vènt,
se sènt fischiè da d'fòra sa 'n lamènt,
ch'la gènt la dvénta goba 'n t'ì capott.

I albre spujèd e nud i fà da sfond,
ma 'n quèdre piturèd in bianch e nér,
senz'anima par gnènt le foj legér,
le casca sa'l balétt del girotond.

Sol una foja armasta a spindulon,
pèr cla cumbata l'ultima partida,
guèsi a sfidè,sfacèda, ma'l Padron.

E la se sbatt tachèda ma la vida,
fin a che 'n soffi fort de ventulon,
i fa capì che propi l'ajè fnìda.

Acsé la s'lascia e pièn la casca giò,
la s'abandona ma l'abracc del vènt,
ch'i l'acumpagna com t'un valzer lènt
déntra ma'n mond in do' an s'insonia piò.

Mo lia l'insonia ancora, insonia e bala,
forse chisà par sempre balarìa,
in t'el silenzi cla su sinfunìa
ch'i la fa mòva com una farfala.

E già cla libertà ch'an vàl più gnènt,
la dvénta ancora com un emozion
lighèda ma'l destén t'na bèva d'vènt.

L'è guèsi com un giogh senza ragion...
La foja, stascighèda via dal vènt,
la mòr insièm sa l'ultima ilusion.