Més de luj...Un merculdé...

Més de luj, un merculdé,
l'era l'ott, an s'po' sbajè
e in sta' Pésre me ann'èl sò,
ogni tant sucéd qualcò' !!

Cèrt sta' roba l'ajè grosa
ch'm'ha chiapèd com una scosa
e me v-nùd par l'emozion,
la pèll guèsi...da capon !
Donca el fatt : ch'èl merculdé,
a la sera tant par fè,
el bsarés el và a maréna
e fè la pasegiadéna.
Tutti a pìd, par la salùd,
un bèl gléd magnèd e bùd...!!
Ecch...Distànt propi de front,
sòra 'l mèr, in tl'orizont,
a 'n cèrt punt, s'véd un qualcò'...
che d'precìs co'l'è ann'el sò...
C'è dle luc, mo an s'capésc bèn...
Fors d'i fogh ch'i fà vérs Fèn...!!
Mo an po' essa, che i fanés,
par dispètt ma no' bsarés
e ma quéi ch'i stà' d'intorne,
dic che i fogh i fa'n de giorne !!

Ehh...!! Mo alora co' sarà,
tutt stè luc cle s'véd maquà...??

El dic un ch' l' ha studièd tant:
" Guardè bèn, jè i disch volant..!! "
'N antre invéc ignoranton,
dic: " Un pèra de quaion...
T'véd ch'i è tond invéc che piatt,
co' t'ha i occh com i bugatt...!!
Mo 'n do' t'vìv imbarbugìd,
quéi iè i UFO, garantìd... "

E smiciànd de quà e de là,
s'è ardunèd mèza cità !
Mèza Pésre, par maréna,
a guardè stà roba stréna,
occh in alt com in tle favòl...
(Anca sa'n s'vedéva 'n cavòl...!)

Tutti prò i a vést qualcò',
e nisciun diciva d'no !

" Me ajò vést..." " No a l'ho vést me...
l'ho guardèd préma de te..."
" A so' me ch'l'ho vést par prém..."
Sgàgia fort un ragazén...
" Te sta zétt !!" El dic un atre,
" Imbecéll !!" " Testa de quatre !!"
" Ignorant, moramazéd...
Me par prém ajò avistèd,
'na gran luc...Com una stèla..."
Strélla cl'atre : " Tu surèla...
me da iri a stàgh maché
fèrme, in pìd sol a guardè
tutt el mèr che 'l stà de front,
dùr, sa i occh in tl' orizont,
mo ann'ho vést nisciun marzièn...
Tutt tèmp pèrs...Boja d'un chèn...!!
Prò a voj dì sinceramènt,
che voiatre an capì gnènt...!!
Mo ann'è miga naturèl,
stè' casén universèl...!!
Pudrìa essa in fond in fond,
ch'è cmincièd la fén del mond...!!"

Prest un antre i'l métt i riga :
" Dì...ma te-e...Co' te port sfiga...??!
Par do' lamp malà t'el sfond,
a da v-nì la fén del mond...??
Di'm un po' brutt lazaron,
co' t'và in cerca di minchion...??"

Acsé 'l tort e la ragion
tutt mischièd t'na discusion...
Urla te, ch'ajurlè me,
a c'metém a strilè in tre...
S'è cmincèd a fè a cagnèra,
par 'na roba...ch'manca c'era...!!
Propi tipìch dle person,
dla cità de Pasqualon...!!

I bsarés, ragazi mia,
iè 'n po' scars d'filosofia,
iè sigur di cacianés,
e de quést a so' persuès,
mo 'na volta ch'ia savud,
giudighèd e risolud,
i créd anca, e ann'è segrét,
ma la strolga del Farnét...!!

-------------------------------------------------------------------------------------------------
Franco Ferri