El lèdre

Vèn voja cèrt momènt d'vultèss indrìa,
sol par gì a véda 'n po' co' s'è lascèd,
cla sia curiosità o nostalgia,
s'armàn lighèdi sempre ma'l pasèd.

E s'và cercand qualcò' ch'an s'trova più,
magari pàr arvìva acsé ogni tant,
una muliga de cla gioventù,
cla s'è brucèda com un furminant.

E com un furminant butèda via,
senza pensè cla pò arturnè tla mènt
guèsi la fussa 'na fotografia,
un po' sbiavida 'do' ch'an s'véd più gnènt.

E vèn propi da rida cèrtle volt,
com cèrtle volt invéc un po' se piagn,
sol al pensìr de co' c'è stèda già tolt,
parchè purtropp adèss, ann'è cumpagn.

L'è 'n lèdre el tèmp...!! El chiapa, èl porta via,
l'arvéna el spàca in do' cl' è pasèd,
propi com fussa 'n delinguènt pur sia,
e po' la prèscia cl'ha stè disgrazièd...!!

Mo par fè svélt in t'èl rubè el ce lascia,
certi ricord ch'i era nascost t'èl còr,
insièm sa 'na speranza cla po' nascia,
o 'n sentimènt sincér...Come l'amòr.