El fior

In t'un camp tutt pén d'erbàcc,
tra pèzz de vétre, plastiga, feràcc,
tra cle mundézz malé butèdle via,
e in mèzz ma 'na muntagna d'purcarìa,
'n do' ch'an s'pudéva stè par via dl'udor,
me capitèd, par sbaj, da véda 'n fior.
Sa 'n po' de maravéja a l'ho guardèd,
cercand d'capì cum fussa capitèd
in t'un ch'èl post acsé tant malamènt,
tramèzz a clè robacc cl'en sèrv a gnènt.

Mo prò ch'èl fior el me paréva dì,
che cèrtle rob dla vita an s'po' capì...
Tra cle mundézz l'era sbocèd un fior,
com in t'el còr d'un om el nasc l'amor.