L'è 'l domélla !

Acsé gira mista e brélla,
sém arìv in t'èl domélla !!
Secol pén d'inovazion,
e de gran bèli invenzion.
Ecch, presémpi par cminciè,
s'un el vo' telefunè,
ogg i vénd un bèl giughén,
cl'è chiamèd "telefunén".
I bsarés i dvénta matt,
i l'hann tutti ormèi anca i gatt !!
Sa st'afari in t'una mèn,
o chi porta a spass ma'l chén,
o chi curr, o chi caména,
sempre i stà sa la manéna
picighèda ma i urécch,
par parlè sa st'aparécch.

El "Compiuter" ? Ve pèr gnènt ?
C'è stèd tanti gambiamènt,
in sta' nostra società,
ch'ogigiorne guèi ch'in l'ha !!
In t'i ufici specialmènt,
senza d'quél in sa fè gnènt.
An sò manca di parchè...
'No cumprèd un anca me.
M'arésc poch, prò l'è tant bèl,
com s'el fuss...'n antre cervèl.
Te t'el cénd...el fà tutt lo,
(cum s'adopra prò ann'el so!)

Pésre pur l'ajè gambièda,
più moderna, più stimèda,
è dvéntèda granda, bèla,
che da gust anca girèla !
Armàn sempre 'n gran paéson
de cènt méla e più person,
prò jà 'rfatt el Palasport,
jà fatt grand da bestia el port,
ja fatt nòv mo par davér,
la stazion par le coriér,
e par fè na roba bléna,
jà méss anca na funtèna.

E po' mèchin,muturén
chiass, rumor, un gran casén
par le strèd de ste cità...
L'è 'l domélla...Capirà...!!
Prò, s'in piaza a m'trov par chès,
par fè 'n gìr o caciè 'l nés,
certle volt c'è l'impresion,
d'véda 'n ombra...Pasqualon...