La Rita la fa le musigh...e sperém cl'an sbaja...Mo l'an sbajà de sigur, la Rita l'ajè sempre precisa, la me fà guèsi v-nì el nervos da quant l'ajè precisa...l'è più probabil ch'a sbaj me.
Le luc le fà Giorgio...Insomma sperém che vénga fòra 'na roba bléna. Anca parchè anca se...a sò sigur, an ce sarà tanta gènt, Pasqualon l'è sempre Pasqualon e me pia-crìa che insomma ...me pia-crìa che vnéssa fòra 'na roba decènt. Bsogna dì prò che anca s'ajavém da léggia, anca se ann'è com se dovéssa fè propi propi 'na comédia vera, un po' d'emozion la c'è sempre. Me pèr nurmèl. Bèl punt sa'l frédd de sti giorne ne v-nùd anca el mèl de gola...Tant par dì. Donca staséra, che po' sarìa el giorne 25 de gnér, a fém 'na spéc de prova generèl...e po' sucéd quél che sucéd. Le prov a l'avém fatt maché a chèsa mia, l'è guèsi un més ormèi, ecch, alora dicém che magari a recitém par noiatre ecch...bèl punt sabot e dmeniga c'è anca 'na comédia grosa al Sperimentèl, e po' c'è 'n antra comedia, prò in italièn, da 'n antra part...Insomma ann'è che c'è tant da goda...mo va bèn acsé.
Prò a voj dì 'na roba....L'era el séi de gnér de mille e novcènt e stanta quand ajò propi propi cmincéd a recitè... e me an savéva ne a pudéva savé che giust giust quarant'ann dop ajavrìa fatt un qualco' su PASQUALON. Bè...de quést a sò cuntènt... al sò, magari de sta roba ann'i fréga gnènt ma nisciun...Mo ma me se...m'importa. Un qualco' de bon, anca se poch, tla vita mia a l'ho fatt...MI pèdre una volta el m'ha détt :" Se al post d'esse acsé fisèd par el dialétt, e par ste "cara" de teatro, t'er fisèd par studiè...ann'era méj...??"....SE ba...!! Era méj...Era méj de sigur...Mo dlé volt, el destén o chi par lo el decìd al post nostre...me dispièc. Adèss che i giogh jè guèsi fatt, adèss che ajò l'età tua de quand t'm'ha dètt sta roba...a te poss dì che forse t'avév ragion te. Mo me, créd pur, ann'i poss fè gnènt. L'è gida acsé. Prò, se t'er ancora maché, a so sigur che t'me v-nìv a véda...t'me v-nìv a véda com t'ha sempre fatt.
F.F.
Nessun commento:
Posta un commento